Ek het Adder Kasteel baie geniet. Dit is 'n spanningsvolle verhaal: romanse verweef met misdaad en bonatuurlike verskynsels.
Sommer met die intrapslag het die hoofkarakter, Altus, 'n "ontmoeting" met 'n gees terwyl hy nog op pad is na die vernaamde Maritz-kasteel, beter bekend as Die Spookhuis, wat omskep is in 'n gastehuis. Altus is 'n skrywer, en die gerugte oor dwaalgeeste in die kasteel, het sy verbeelding aangegryp. Boonop het hy verneem dat ou Jochemus destyds, net voor die oorlog, 'n trommel vol geld begrawe het, wat nog nooit weer gevind is nie - en dit is hoofsaaklik die rede vir sy besoek.
Hy is nie die enigste persoon wat na die versteekte trommel op soek is nie, en dinge ruk handuit. As daar nou één karakter is wat my gefassineer het, dan is dit die geheimsinnige Trevor wat tydig en ontydig sy opwagting maak.
Ek kan Adder Kasteel beslis aanbeveel. Die verhaal is boeiend en hou 'n mens aan die wonder oor wat die skakel tussen die dwaalgeeste en die onnatuurlike dood van die gaste is. Veral omdat hulle deur slange gepik word wat nie tipies in daardie omgewing voorkom nie.
Die raaisels verdiep soos wat die verhaal ontvou en die spanning opbou. Die ontknoping is verrassend en onvoorspelbaar.