Neriah Bloemendal, die wêreldkampioen gimnas, kuier vir ʼn paar dae by haar afgetrede ouers in Lambertsbaai aan die Weskus. Net voor sy terug gaan Amerika toe vir een van haar groot vertonings, tref ’n groot krisis hul familie. Haar jongste broer, Marnus, word gevang met ʼn groot besending dwelms en sy weiering om inligting in verband met die dwelmsindikaat te verskaf, maak alles net nog moeiliker.
Die Bloemendal-familie het skaars kans gekry om hierdie slegte nuus te verwerk, of Neriah verdwyn self op ʼn baie misterieuse manier. Die hulp van speursersant Whitelock van die Vermiste Persone tak moes dringend ingewin word om sersant Annandale met die ondersoek te help. Albei hierdie regsmanne besef maar te goed dat indien die media moet agterkom dat sy vermis word, daar baie druk op hulle geplaas sal word om haar te vind. Sy is immers ʼn huishoudelike naam reg oor die wêreld!
Is sy ontvoer, en hoekom? Hou dit verband met haar broer se inhegtenisname as dwelmhandelaar? Waar moet hulle begin soek? Gaan hul Neriah lewend kry?
